బీజేపీ (BJP)ని గెలిపిస్తే హైదరాబాద్ (Hyderabad)ను భాగ్యనగర్‌గా మారుస్తామని యూపీ సీఎం యోగి ఆదిత్యనాథ్ (Yogi Adityanath) అన్నారు. కేసీఆర్ రూపంలో మరో నిజాం వస్తున్నారని విమర్శించారు. శనివారం నగరంలో పర్యటించిన యోగి ఆదిత్యనాథ్.. కూకట్ పల్లి, జీడిమెట్ల, మల్కాజ్‌గిరి ప్రాంతాల్లో రోడ్ షో నిర్వహించారు. అనంతరం పాతబస్తీలోని లాల్‌దర్వాజ ఆలయం సమీపంలో జరిగిన 'భాగ్యనగర్ శంఖారావం' బహిరంగ సభలో పాల్గొని ప్రసంగించారు. ఈ సందర్భంగా మాట్లాడిన యోగి ఆదిత్యనాథ్.. సీఎం కేసీఆర్‌పై తీవ్ర స్థాయిలో విరుచుకుపడ్డారు. ఎంఐఎంతో కలిసి తెలంగాణ ప్రజలకు టీఆర్ఎస్ ప్రభుత్వం అన్యాయం చేస్తోందని విమర్శించారు.
వరద సాయం పేరిట టీఆర్ఎస్ సర్కార్ అవినీతికి పాల్పడిందని యోగి మండిపడ్డారు. వరద బాధితులకు వరద సాయం డబ్బులను నేరుగా బ్యాంక్ ఖాతాల్లో ఎందుకు వేయలేదని ప్రశ్నించారు. టీఆర్ఎస్ కార్యకర్తల కోసమే నగదు రూపంలో పంపిణీ చేపట్టారని విమర్శించారు. అసలైన బాధితులకు ఇవ్వకుండా కార్యకర్తలకే డబ్బులను పంచారని దుయ్యబట్టారు యూపీ సీఎం యోగి. ప్రధాన మంత్రి ఆవాస్ యోజన కింద పేదలకు ఎందుకు ఇళ్లు కట్టలేదని.. యూపీలో బీజేపీ సర్కార్ 15 లక్షల ఇళ్లను ఇచ్చిందని అన్నారు. రాష్ట్రంలో కుటుంబపాలన పోయి.. అభివృద్ధి జరగాలంటే ప్రజలంతా బీజేపీకి ఓటు వేయాలని పిలుపునిచ్చారు.
0 Comments