నిరుద్యోగులకు మరో గుడ్ న్యూస్.. తెలంగాణలో తొలిసారి నోటిఫికేషన్

తెలంగాణ నిరుద్యోగులకు ప్రభుత్వం మరో గుడ్ న్యూస్ చెప్పింది. సొంత రాష్ట్రం సిద్ధించిన తర్వాత తొలిసారి గ్రూప్ - 1 ఉద్యోగాల నోటిఫికేషన్ విడుదలైంది. రాష్ట్రంలో 503 గ్రూప్ 1 పోస్టుల భర్తీకి టీఎస్‌పీఎస్సీ నోటిఫికేషన్ విడుదల చేసింది. టీఎస్‌పీఎస్సీ చైర్మన్ జనార్ధన్ రెడ్డి, సెక్రటరీ అనితా రామచంద్రన్ గ్రూప్ 1 నోటిఫికేషన్‌ను విడుదల చేశారు. గ్రూప్ 1 పోస్టులకు ఇంటర్వ్యూల ప్రక్రియను తొలగిస్తూ ఇటీవల ప్రభుత్వం జీవో విడుదల చేసింది. ప్రిలిమ్స్, మెయిన్స్‌ అనే రెండు పరీక్షలు రాయాల్సి ఉంటుంది. అందులో ప్రిలిమ్స్ కేవలం క్వాలిఫైయింగ్‌కి మాత్రమే. మెయిన్స్‌లో మెరిట్ సాధించిన వారితో ఉద్యోగాలు భర్తీ చేయనున్నారు. వచ్చే నెల 2వ తేదీ నుంచి నెలాఖరు వరకు దరఖాస్తు చేసుకోవచ్చు.

గ్రూప్ 1 నోటిఫికేషన్‌లో భాగంగా 42 డిప్యూటీ కలెక్టర్ పోస్టులు, డీఎస్పీ 92, డీఎస్పీ జైళ్లు 2, అసిస్టెంట్ ఎక్సైజ్ సూపరింటెండెంట్లు 26, ట్యాక్స్ ఆఫీసర్ 48, గ్రేడ్ 2 మున్సిపల్ కమిషనర్లు 41, ఎంపీడీవో 121 పోస్టులు భర్తీ చేయనున్నారు. బీసీ సంక్షేమ శాఖ, ఎస్సీ సంక్షేమ శాఖ, రవాణా శాఖ, పంచాయతీ రాజ్, రిజిస్ట్రేషన్లు, తదితర శాఖల్లోనూ పోస్టులు భర్తీ కానున్నాయి. ప్రిలిమ్స్ పరీక్షలు ఆగస్టులో నిర్వహించే అవకాశమున్నట్లు తెలుస్తోంది. నవంబర్ లేదా డిసెంబర్‌లో మెయిన్స్‌ ఉండొచ్చని టీఎస్‌పీఎస్సీ తెలిపింది.