ఏపీ ప్రజలకు ముఖ్య గమనిక.. ఈ జాగ్రత్తలు తీసుకోవాలని సూచన

ఆంధ్రప్రదేశ్‌లో ఎండలు మండిపోతున్నాయి.. రాష్ట్రవ్యాప్తంగా అధిక ఉష్ణోగ్రతలకు తోడు వడగాల్పులతో జనాలు అల్లాడిపోతున్నారు. గతవారం నుంచి చాలా జిల్లాల్లో ఇదే పరిస్థితి కనిపిస్తోంది.. జనాలు ఇళ్లలో నుంచి బయటకు అడుగు వేయాలంటేనే భయపడుతున్నారు. సోమవారం పల్నాడు జిల్లాలోని అమరావతి మండలం లో తీవ్ర వడగాల్పు ఉంటాయని విపత్తుల నిర్వహణ శాఖ హెచ్చరించింది. మిగిలిన చోట్ల 57 మండలాల్లో వడగాల్పులు వీచే అవకాశం ఉందన్నారు.

తీవ్రమైన ఎండలు, వడగాల్పుల దృష్ట్యా కొన్ని జాగ్రత్తలు తీసుకోవాలని ఏపీ విపత్తుల నిర్వహణశాఖ ప్రజలకు సూచించింది. వీలైనంత వరకు ఎండలో బయటకు వెళ్ళకుండా ఉండాలని.. మనుషులతో పాటూ పెంపుడు జంతువులకు పుష్కలంగా నీరుని అందించాలని సూచించారు. కొన్ని జాగ్రత్తలు తప్పనిసరిగా తీసుకోవాలని కోరింది. వీలైనంత వరకు ఇంట్లో ఉండటానికి ప్రయత్నించాలని.. దాహం వేయకపోయినా తరచుగా నీటిని తాగాలని అధికారులు చెబుతున్నారు.

ఎండలో నుంచి వచ్చిన వెంటనే నీరు కానీ, నిమ్మరసం కానీ, కొబ్బరి నీరు కానీ ఉప్పుకలిపిన మజ్జిగ, గ్లూకోజ్, ఓఆర్ఎస్ కలిపిన నీటిని తాగాలని సూచించారు. అలాగే ఎండాకాలం కాబట్టి తేలికపాటి, తెలుపు రంగు ఉన్న కాటన్ వస్త్రాలను ధరించాలంటున్నారు. అలాగే జంతువులను షెడ్‌లో ఉంచి తాగటానికి నీటిని పుష్కలంగా అందించాలని సూచించారు.

అంతేకాదు జనాలు ముందు జాగ్రత్తగా డీహైడ్రేట్‌ కాకుండా ఓఆర్‌ఎస్‌, నిమ్మకాయ నీరు, మజ్జిగ, కొబ్బరినీరు, లస్సీ వంటివి తాగితే మంచిదని సూచిస్తున్నారు. అలాగే వృద్ధులు, గర్భిణీలు, బాలింతలు, పిల్లలు ఎక్కువగా జాగ్రత్తలు తీసుకోవాలని చెబుతున్నారు. జనాలు అత్యవసరమైతే తప్ప సాయంత్రం వరకు బయటకు రావొద్దని.. ఇంట్లోనే ఉంటూ తగిన జాగ్రత్తలు తీసుకోవడం మంచిది అంటున్నారు. రాష్ట్రంలోని కొన్ని జిల్లాల్లో మరికొద్ది రోజులు ఇవే పరిస్థితులు ఉంటాయంటున్నారు అధికారులు.