తెలంగాణ దేశంలోనే అద్భుత రాష్ట్రం: ఉగాది వేడుకల్లో కేసీఆర్

తెలంగాణ దేశంలోనే అద్భుత రాష్ట్రంగా ఎదగడం ఖాయమని ముఖ్యమంత్రి కేసీఆర్ అన్నారు. ప్రగతిభవన్‌‌లో నిర్వహించిన ఉగాది వేడుకల్లో ఆయన పాల్గొన్నారు. ఈ సందర్భంగా మాట్లాడుతూ.. ఒకనాడు కరెంటు కోతలు, వ్యవసాయానికి నీటి కొరత.. ఇతర సమస్యలతో కుదేలైన తెలంగాణ ప్రాంతం.. ప్రత్యేక రాష్ట్రంగా ఏర్పడిన తర్వాత అన్ని రంగాల్లో దూసుకుపోతోంది. కులం, మతం, జాతి అన్న తేడా లేకుండా అందరినీ సత్కరించే సంస్కారాన్ని తెలంగాణ సమాజానికి ఇచ్చిన దేవుడికి ధన్యవాదాలు చెబుతున్నా. తెలంగాణలో జరుగుతున్న అభివృద్ధి కారణంగా గతంలో రూ.వేలల్లో ఉన్న భూముల ధరలు ఇప్పుడు రూ.కోట్లల్లో పలుకుతున్నాయి. ఆర్థిక వృద్ధితో పాటు ఇతర విషయాల్లోనూ దేశంలోని ఏ రాష్ట్రమూ తెలంగాణకు దరిదాపుల్లోకి రావడం లేదు. కొందరు ఉద్దేశపూర్వకంగా అభివృద్ధి అడ్డుకోవాలని చూస్తున్నా సవాళ్లను అధిగమించి సుపరిపాలన అందిస్తున్నాం’ అని కేసీఆర్ పేర్కొన్నారు. ఈ కార్యక్రమంలో తెలంగాణ మంత్రులు, పలువురు ప్రజాప్రతినిధులు, వివిధ శాఖల అధికారులు, సినీనటుడు ఆర్.నారాయణమూర్తి తదితరులు పాల్గొన్నారు.

తెలంగాణలో ఈ ఏడాది అద్భుతాలు జరగబోతున్నాయని ప్రముఖ సిద్ధాంతి బాచుపల్లి సంతోష్‌కుమార్ శర్మ తెలిపారు. ఉగాది పండగ సందర్భంగా తెలంగాణ ప్రభుత్వం ఆధ్వర్యంలో ప్రగతిభవన్‌లో ఆయన పంచాంగ శ్రవణం నిర్వహించారు. ఈ సందర్భంగా ఆయన మాట్లాడుతూ.. తెలంగాణలో వర్షాలు బాగా కురుస్తాయి. విద్యా రంగంలో చాలా మార్పులు వస్తాయి. ఇది ఉద్యోగ నామ సంవత్సరం. నిరుద్యోగుల పంట పండుతోంది. వర్క్ ఫ్రమ్ హోమ్ ఉండదు. అన్ని విషయాల్లో 75శాతం అనుకూలం.. 25శాతం ప్రతికూలంగా ఉంటుంది’ అని చెప్పారు.