ఎన్టీఆర్ జిల్లా జి.కొండూరు మండలం చెవుటూరుకు చెందిన ఏసుబాబు, శివగంగల దంపతుల కుమారుడు లక్ష్మణ్‌కు రెండేళ్ల కిందట జరిగిన రోడ్డు ప్రమాదంలో తలకు బలమైన గాయమైంది. 71 రోజులు ఆస్పత్రిలోనే వైద్యం పొందినప్పటికీ.. పూర్తిగా నయం కాలేదు. కాలు చచ్చుపడిపోయింది. కూలి పనులు చేసుకునే తల్లిదండ్రులు.. శక్తికి మించి వైద్యం చేయించారు. అటు.. ప్రతి నెలా మందులకు రూ.10 వేలు వెచ్చించడం భారంగా మారింది. ఇలాంటి పరిస్థితుల్లో సీఎం జగన్‌ను కలిస్తే తమకు న్యాయం జరుగుతుందని బాధితుడు లక్ష్మణ్.. తన తల్లిదండ్రులతో విజయవాడకు వచ్చాడు.
వీరిని చూసిన జగన్.. కారులో ఉండగానే.. అతడి సమస్య ఏంటో తెలుసుకోవాలని తన సెక్యూరిటీ అధికారులను సీఎం జగన్ ఆదేశించారు. ఆ వెంటనే.. అతడి వివరాలను కలెక్టర్‌ దృష్టికి తీసుకెళ్లాలని సూచించారు. అంతటితో ఆగకుండా.. ఆ తర్వాత కూడా యువకుడి విషయం ఎంతవరకు వచ్చిందని జగన్ మరోసారి ఆరా తీశారు. పూర్తి వివరాలు తెలుసుకున్న జగన్.. ఆ యువకుడికి అవసరమైన సాయం అందేలా.. వైద్యానికి అవసరమైన ఖర్చును అంచనా వేసి తనకు వివరాలు పంపాలని ఆదేశించారు. ముఖ్యమంత్రి ఆదేశాలతో అధికారులు రంగంలోకి దిగారు.
కలెక్టర్‌ ఢిల్లీ రావు స్వయంగా తన వాహనాన్ని యువకుడి ఉన్న చోటుకు పంపారు. అతడిని తన కార్యాలయానికి తీసుకురావాలని సూచించారు. కుటుంబ సభ్యుల ద్వారా అతడి పరిస్థితిని తెలుసుకున్నారు. ఆ వెంటనే డీఎంహెచ్‌ఓను పిలిపించి.. చికిత్స నిమిత్తం యువకుడిని ఓ ప్రైవేటు ఆస్పత్రిలో చేర్పించారు. తక్షణ సహాయం కింద లక్ష రూపాయల చెక్కును కలెక్టర్‌ ఢిల్లీ రావు ఆ యువకుడికి అందజేశారు. దీంతో ఆ కుటుంబం భావోద్వేగానికి గురైంది. జగన్ చేసిన మేలు మర్చిపోలేమని.. లక్ష్మణ్ తండ్రి ఏసుబాబు చెప్పారు.
0 Comments