అన్నదాతల ఖాతాల్లోకి రైతు భరోసా నగదు.. మళ్లీ నమోదుకు అవకాశం..

ఏపీలో రైతులకు జగన్ సర్కార్ మరో శుభవార్త చెప్పింది. వైఎస్సార్‌ ఉచిత పంటల బీమా పథకం కింద ఖరీఫ్‌–2020 సీజన్‌కు సంబంధించి అర్హులైన రైతులకు బీమా సొమ్ము చెల్లించేందుకు రూ.2,586.60 కోట్లను ప్రభుత్వం విడుదల చేసింది. ఈ మేరకు వ్యవసాయ శాఖ స్పెషల్‌ చీఫ్‌ సెక్రటరీ పూనం మాలకొండయ్య ఉత్తర్వులు జారీ చేశారు. ఈ మొత్తాన్ని రియల్‌ టైం గవర్నెన్స్‌ ద్వారా ఈ నెల 25న ఆధార్‌తో లింక్‌ చేసిన రైతుల బ్యాంకు ఖాతాల్లో నేరుగా జమ చేయనున్నారు. ఈ మేరకు అర్హుల జాబితాలు సిద్ధం చేసి పంపిణీకి ఏర్పాట్లు చెయ్యాలని వ్యవసాయ శాఖ కమిషనర్‌ను ఆదేశించారు.

మరోవైపు ఇవాళ ఖరీఫ్‌ సాగుకు సన్నద్దమవుతున్న అన్నదాతలకు పెట్టుబడి సాయం అందజేసింది. వైఎస్సార్‌ రైతు భరోసా–పీఎం కిసాన్‌ కింద గురువారం తొలి విడత సాయం విడుదల చేసింది. ముఖ్యమంత్రి వైఎస్ జగన్ క్యాంప్ కార్యాలయంలో బటన్ నొక్కి ప్రారంభించారు. రైతు భరోసాకు ఈ ఏడాది 52,38,517 రైతులుఅర్హత పొందగా.. వీరిలో 1,86,254 మంది భూమి లేని ఎస్సీ, ఎస్టీ, బీసీ, మైనార్టీ, అటవీ సాగు దారులున్నారు. వీరికి పీఎం కిసాన్‌ కింద రూ.1,010.45 కోట్లు, రైతు భరోసా కింద రూ.2,918.43 కోట్లు కలిపి.. తొలి విడతగా రూ.3,928.88 కోట్లు జమ చేశారు. ఈ ఏడాది అర్హత పొందిన వారిలో భూ యజమానులు 50,52,263 మంది ఉండగా (యానాం రైతులతో కలిపి), భూమి లేని 1,86,254 మంది ఎస్సీ, ఎస్టీ, బీసీ, మైనార్టీ, అటవీ సాగుదారులతో పాటు కేంద్ర పాలిత ప్రాంతమైన యానాంకు చెందిన 865 రైతు కుటుంబాలు లబ్ధి పొందారు.