ఏపీ ఉద్యోగులకు శుభవార్త: ప్రభుత్వ ఆఫీసుల టైమింగ్ మార్పు..

ఆంధ్రప్రదేశ్‌లో కరోనా వైరస్ మహమ్మారి విలయతాండవం చేస్తోంది. కరోనా మహమ్మారిని కట్టడి చేసేందుకు ఆంధ్రప్రదేశ్ ప్రభుత్వం రాష్ట్రవ్యాప్తంగా కర్ఫ్యూ అమలు చేస్తోంది. ఈ తరుణంలో రాష్ట్ర ప్రభుత్వ ఉద్యోగులను దృష్టిలో ఉంచుకుని జగన్ ప్రభుత్వం మరో నిర్ణయం తీసుకుంది. ప్రభుత్వ ఉద్యోగుల పనివేళలను మారుస్తూ రాష్ట్ర ప్రభుత్వం కీలక నిర్ణయం తీసుకుంది. ఈ మేరకు శుక్రవారం ఉత్తర్వులు జారీ చేసింది. కర్ఫ్యూ నేపథ్యంలో ఉదయం 8 గంటల నుంచి 11:30 గంటల వరకే ప్రభుత్వ కార్యాలయాలు పనిచేస్తాయని పేర్కొంది. ఉద్యోగులు ఆ సమయాల్లో విధుల్లో ఉండాల్సి ఉంటుందని స్పష్టం చేసింది.

రాష్ట్ర సచివాలయం, ఆయా శాఖల అధినేతలు, జిల్లా కార్యాలయాలు, సబ్ డివిజనల్ కార్యాలయాల్లో ఈ సమయవేళలు అమలులోకి రానున్నాయి. ఒకవేళ మధ్యాహ్నం 12 గంటల తర్వాత కార్యాలయాల్లో ఉండాలంటే ఉద్యోగులకు కచ్చితంగా పాసులు కలిగి ఉండాలని అధికారులు తెలిపారు.

కాగా, రాష్ట్రవ్యాప్తంగా ప్రస్తుతం కర్ఫ్యూ అమలులో ఉన్న విషయం తెలిసిందే. ప్రతి రోజూ ఉదయం 6 గంటల నుంచి మధ్యాహ్నం 12 గంటల వరకు మాత్రమే కార్యకలాపాలు సాగనున్నాయి. ప్రతి రోజూ మధ్యాహ్నం 12 గంటల తర్వాత పూర్తిగా కర్ఫ్యూ అమలులోకి రానుంది. అత్యవసర సర్వీసులకు ఏపీ ప్రభుత్వం మినహాయింపు ఇచ్చింది. ఈ తరుణంలో ప్రభుత్వం ఉద్యోగుల పనివేళలను కుదిస్తూ నిర్ణయం తీసుకుంది.