శుభవార్త: పీఎం కిసాన్- రైతు భరోసాకు లైన్ క్లియర్.. ఆరోజే అకౌంట్లలో డబ్బు జమ!

ఆంధ్రప్రదేశ్ రైతులకు జగన్ ప్రభుత్వం శుభవార్త చెప్పింది. వైఎస్సార్‌ రైతు భరోసా- పీఎం కిసాన్ మూడో విడత అమలుకు రాష్ట్ర మంత్రి మండలి ఆమోదం తెలిపింది. శుక్రవారం ముఖ్యమంత్రి జగన్ నేతృత్వంలో నిర్వహించిన మంత్రి వర్గ సమావేశంలో ఈ మేరకు నిర్ణయం తీసుకున్నారు. దీంతో ఈ వ్యవసాయ సీజన్‌కు సంబంధించి డిసెంబర్‌ 29వ తేదీన ఆంధ్రప్రదేశ్ వ్యాప్తంగా ఉన్న 50.47 లక్షల మంది రైతుల ఖాతాల్లో రూ.1,009 కోట్లు నేరుగా జమ కాబోతున్నాయి. ఒక్కో రైతు ఖాతాలో రూ. 2 వేలు చొప్పున ప్రభుత్వం జమ చేయనుంది.

పీఎం కిసాన్

కాగా, ఇది వరకే వైఎస్సార్‌ రైతు భరోసా కింద రెండు విడతల్లో ఒక్కో రైతు ఖాతాలో రూ.11,500 చొప్పున జమ చేసిన విషయం తెలిసిందే. కాగా, పీఎం కిసాన్ యోజనలో భాగంగా కేంద్ర ప్రభుత్వం రైతులకు ఏటా మూడు వాయిదాల్లో రూ. 6 వేలు ఆర్థిక సాయం చేస్తున్న సంగతి తెలిసిందే. ఇప్పటికే రెండు వాయిదాలు చెల్లించగా, మూడో వాయిదా డబ్బులు బ్యాంకు ఖాతాల్లో జమ చేయడం ఆలస్యం అయింది. డిసెంబర్ 1వ తేదీనే ఈ మొత్తం రైతుల ఖాతాల్లో పడాల్సి ఉండగా, సాంకేతిక కారణాలతో నెలాఖరుకు పడబోతున్నాయి.

కేంద్ర ప్రభుత్వం ఏప్రిల్, ఆగస్టు, డిసెంబర్ నెలల్లో.. మూడు వాయిదాల్లో రైతులకు రూ.6 వేలు సాయం చేస్తోంది. జగన్ ప్రభుత్వం ఇచ్చే రూ. 7,500 కలిపి.. మొత్తం రూ. 13,500 ప్రతి ఏటా రైతుల ఖాతాల్లో జమ అవుతోంది. చివరి విడతగా కేంద్ర ప్రభుత్వం ఇచ్చే రూ. 2,000 రాష్ట్ర ప్రభుత్వ ఆమోదంతో ఈ నెల 29న రైతుల ఖాతాల్లో జమకాబోతుంది.