తెలంగాణ బీజేపీ అధ్యక్షుడు బండి సంజయ్ కరీంనగర్ ఆస్పత్రిలో దీక్ష విరమించారు. మాజీ ఎంపీలు వివేక్, జితేందర్‌రెడ్డి నిమ్మరసం ఇచ్చి సంజయ్ చేత దీక్ష విరమింపజేశారు. కరీంనగర్ బీజేపీ పార్టీ ఆఫీసులో దీక్షకు చేస్తున్న బండి సంజయ్ ఆరోగ్య పరిస్థితి క్షీణించడంతో... పోలీసులు ఆయనను ఆస్పత్రికి తరలించారు. ఈ సందర్భంగా పెద్ద ఎత్తున బీజేపీ కార్యకర్తలు, అభిమానులు తరలివచ్చారు. అయితే పోలీసులు బీజేపీ కార్యకర్తలను చెదరగొట్టి... బండి సంజయ్‌ను అక్కడిని నుంచి ఆస్పత్రికి తరలించారు.
నిన్న దుబ్బాక బీజేపీ అభ్యర్థి రఘునందన్‌రావు బంధువుల ఇళ్లలో పోలీసుల సోదాలు, ఆ తరువాత జరిగిన పరిణామాల నేపథ్యంలో అక్కడకు బయలుదేరిన సంజయ్‌ను పోలీసులు అడ్డుకుని అరెస్ట్ చేసి కరీంనగర్‌కు తరలించారు. దీంతో కరీంనగర్‌లో తన కార్యాలయంలో గత రాత్రి ఒంటరిగానే సంజయ్ దీక్షకు దిగారు. రాత్రి నుంచి కేసీఆర్, హరీష్ రావుకు వ్యతిరేకంగా నినాదాలు చేశారు. అధికారులు, పోలీసుల తీరుపై ఆయన మండిపడ్డారు. సీపీ భార్యను, పిల్లలను తనిఖీ చేస్తే తెలిసేదని... సీఎం కేసీఆర్ భార్యను, పిల్లలను తనిఖీ చేస్తే ఊరుకుంటారా అని ప్రశ్నించారు. సీఎం కేసీఆర్‌కు దమ్ము ధైర్యం లేదని విమర్శించారు. ఓటమి భయంతో పిచ్చి పనులు చేస్తున్నారన్నారు. నిరాహార దీక్ష కొనసాగిస్తానని స్పష్టం చేశారు. దుబ్బాకకు వస్తున్న డబ్బులు కేసీఆర్ ఫామ్ హౌస్‌వే అని..కేసీఆర్ ఫామ్ హౌస్‌ను తనిఖీ చేయాలని బండి సంజయ్ డిమాండ్ చేశారు.
0 Comments