రాజాసింగ్ రోడ్డు షోలో స్వల్ప ఉద్రిక్తత.. అసలేం జరిగిందంటే..

 బీజేపీ ఎమ్మెల్యే రాజాసింగ్ ఎన్నికల ప్రచారంలో స్వల్ప ఉద్రిక్తత చోటుచేసుకుంది. గ్రేటర్ ఎన్నికల ప్రచారంలో భాగంగా రాజాసింగ్ శుక్రవారం ఉదయం కేపీహెచ్‌బీ కాలనీ నుంచి రోడ్ షో ప్రారంభించారు. బాలాజీ నగర్ డివిజన్‌లో ఆయన రోడ్ షో జరుగుతున్న సమయంలో.. అదే దారిలో టీఆర్‌ఎస్ కార్యకర్తలు కూడా వచ్చారు. దీంతో ఇరు పార్టీల నాయకులు పోటాపోటీగా నినాదాలు చేశారు. బీజేపీ నాయకులు వెనక్కి వెళ్లాలంటూ టీఆర్‌ఎస్ శ్రేణులు నినాదాలు చేశారు. అయితే తామేందుకు వెళ్లాలంటూ.. బీజేపీ శ్రేణులు పోటాపోటీగా నినాదాలు చేయడం ప్రారంభించారు. దీంతో ఆ ప్రాంతం ఇరువర్గాల నేతల నినాదాలతో మారుమోగింది. దీంతో అక్కడ స్వల్ప ఉద్రిక్తత చోటుచేసుకుంది. దీంతో రంగంలోకి దిగిన పోలీసులు ఇరువర్గాలను శాంతింపజేశారు. ఈ ఘటనపై బీజేపీ నాయకులు స్పందిస్తూ.. ఎన్నికల ప్రచారంలో పాల్గొన్న నేతలను వెనక్కి వెళ్లాలని టీఆర్‌ఎస్ శ్రేణులు నినాదాలు చేయడం సరికాదని అన్నారు.